Flusstauchen Tessin 2019

21.06 – 23.06.2019

Hesch gwüsst das es ir Schwyz Touchplätz git…
– Wo de nid weisch öb ds Guld oder ds Silber schöner glizeret u glänzt…
– Wo praktisch jede Stei unger Wasser keiner Egge u Kante het…
– Wo Du Häxe drinne gsesch ufemne Bäse rite respektive drivte…
– Wo Du ds „Chraxli“ u „Chlätter“ Brevet fasch muesch ha…
– Wo we d’Sunne dri schiint aues um Di ume faht afa glänze u glitzere…
– Wo we d’Abflussmängi gäbig isch Du vo unge ufe aues gsesch wo obe Wasser isch u derzue chasch dine Luftplääterli zueluege wie sie tanze…
Hesch gwüsst das es ir Schwyz Touchplätz git…
– Wo ou extrem schön si weme se vo Oberwasser geit ga aaluege…
– Wome Spure vom Wasser gseht wes ächli höcher chunt aus mir zum touche gärn hei…
– Wome Gsichter ide Steine fingt wo eim bim touche zueluege…
– Wome ganz genau mues wüsse vieviu Kubikmeter Wasser ir Sekunde obe abe chöme…
– Wome ganz genau mues wüsse öbs witer obe schön isch oder rägnet…
– Wome uf der sichere Site isch, we d’Organisatore wüsse wome das aues cha ga nacheluege…
– Wome scho vo witem ghört was grösseri Abflussmängine (ou weme d’Mängeeinheit nid kennt) für ne Lärm chöi mache…
Hesch gwüsst das weme mit de DiTa’s im Tessin ungerwägs isch me no viu meh aus touche cha erläbe – bsungers we ds Wätter äbe angers isch ausme gärn hätti…
– Me fingt nämlech use das ou d’Umgäbig vom Fluss wunderschöni „Gsichter“ het…
– Me hocket wieder einisch häre u chlopfet ä Jass…
– Me hocket zäme u spiut äs Gsellschaftsspieli…
– Me liegt is Bett u liest im Buech vor nächschte Toucherusbiudig…
– Me macht grad spontan mitem Touchlehrer, wo ou derbi isch, Theoriesequenz wome grad gläse het…
– Me hocket vorem Zimmer u luegt was eim im Rescu Kurs aues erwartet…
– Me hocket igliiret i Wuledechine vorem Zimmer u hääglet am nächschte Gschänk oder ar nächschte Jagge…
– Me geit uf Fotosujetjagt obe Wasser u fingt die ungerschiedlechschte Gschtaute u Forme ir Natur…
– Me gniesst äs usgeprägts Apéro wo scho mitti Namitag afaht…
Hesch gwüsst das weme mit de DiTa’s im Tessin ungerwägs isch me viu cha lehre…
– Me hocket zum z’Morge u zum z’Nacht zäme u lost änang zue was me scho aues für schöni Erfahrige unger Wasser het chönne mache…
– Me ghört was ds Einte oder Angere für Usrüschtigsgägestäng für im chaute Flusswasser ds touche für unabdingbar derbi het…
– Me gspürt der Gägestrom vom Wasser, u merkt de uf einisch das me chli meh Luft brucht aus oscho…
– Me cha am eigete Liib erfahre was Abflussgschwindigkeit heisst – vorauem we de plötzlich der Fluss ganz schmau wird u aues Wasser gäge eim isch…
– Me isch gaaanz überrascht wie churz nächär der drivt zum Usstiig isch (weme sich cha la tribe) wome doch vorhär so hert het gchrampfet…
Genau das Aues u no viu meh chasch erläbe, gspüre, erfahre u mit hei näh wede de am Sunntimittag au dis Touchgrödel wieder ipacksch u richtig hei fahrsch… gsättiget vo coole u schöne Erinnerige u im wüsse, respektive der Hoffnig, das das äuä nid ds letschte mau wird gsi si…
I säge Merci viu mau für das gfröite Wucheändi im Tessin, Diana König
Föteli si vor Céline ur Diana König